(oficiala organo de ĈEJ redaktata de Marek Blahuš)
Ĉeĥa Esperanto-Junularo (ĈEJ) raportas pri sia agado ekde aprilo: Malgraŭ UK kaj IJK en Azio, plej multa agado okazis somere. La Someran Esperanto-Studadon (SES) de E@I en Nitra partoprenis rekorda kvanto de proksimume 25 ĉeĥoj aŭ personoj loĝantaj en Ĉeĥio (kelkaj kunorganizis) inkluzive de Jana HORÁČKOVÁ, gajninto de la konkurso “Lernu Esperanton kaj gajnu eksterlandan vojaĝon”, kies elspezojn kovris ĈEJ.
Miroslav HRUŠKA instruis en SET Lančov dum la 1-a etapo. Aŭguste li renkontis ekstendaranojn kaj partoprenis EU-subvenciitan seminarion de Katalin KOVÁTS dum la Itala Kongreso, kiun ĉeestis ankaŭ Jan NAVRÁTIL. La 2-an de junio li partoprenis Muzean nokton en Svitavy.
Marek BLAHUŠ partoprenis EEU-kongreson en Irlando kaj aŭguste vizitis en Norvegio la Esperanto-klubon de Oslo, post hazarda kunveno kun esperantisto en pola flughaveno. Finaŭguste li ĉeestis inaŭguron de ekspozicio “Post triono” en Liptovský Mikuláš kaj laborbrigadon en la esperanto-arĥivo en Plevník.
Vít MIŠUREC kun Vlasta PIŠTÍKOVÁ partoprenis IJS-n kaj antaŭ ĝi kune kun Dan MRÁZEK kaj Jan ŠEBETOVSKÝ en Prago aranĝon de E-mentál.
Jam de la 20-a ĝis la 22-a de aprilo en Ostrava kunvenis deko da junuloj, inkluzive de grupo el Vroclavo, germana gasto kaj la novulo Vít PALETTA. Samtempe Marek BLAHUŠ kun Peter BALÁŽ gastis en Budapeŝto antaŭ EU-subvenciita seminario pri retlernado en Kipro kaj ligis kontakton kun tiea ununura esperantisto. En majo Marek interpretis en publika konferenco de EEU en Triesto, kien Jiří GALUŠKA venigis studentan grupon el Prago. Jam mezaprile li ĉeestis Tutslovakian renkontiĝon kaj junie renkontis esperantistan paron en Poznań.
La Brna klubo de ĈEJ kunvenis en tejo “Ora rozo” la 2-an de majo (naŭope) kaj ĵaŭde la 20-an de septembro (okope, inkluzive de itala gasto Pierre CALIARI). Pierre, gastigantino Zuzana KOŽUCHOVÁ, Miroslav HRUŠKA kaj Václav ZOUZALÍK dimanĉe ekskursis al Svitavy, sabate la unuaj tri promenis en Brno kun hundo. La 22-an de aŭgusto revenis viziti Brnon Cesáreo GARCÍA FERNÁNDEZ, kiun akceptis Miroslav MALOVEC kaj Marek BLAHUŠ. La lasta ankaŭ prezentis esperanton en lingvoateliero dum la Nokto de sciencistoj la 28-an de septembro.
Post renkonti esperantistojn en Malto, Martin BUREŠ vojaĝis tra Francio kaj nun studas en Liono. Simile Barbora ZÁVODSKÁ iris studi al Oulu (Finnlando) kaj Jirka GALUŠKA, post mallonga staĝo en E@I, nun studas en Konstanz (Germanio). Vít MIŠUREC iris studi al Italio.
La trilandan konferencon en Břeclav ĉeestis 3 junuloj el ĈEJ, post ĝi juna brazila partopreninto George vizitis esperantistojn en Šumice.
ĈEJ gratulas al sia delonga membro Petr Adam DOHNÁLEK okaze de lia edziĝo okazinta la 18-an de aŭgusto en Šilheřovice (ĉeestis tri esperantistoj) kaj ankaŭ al sia honora membro Max KAŠPARŮ okaze de lia elektiĝo en la parlamenton de Regiono Vysočina la 13-an de oktobro.
Retpaĝaro de ĈEJ troviĝas ĉe http://cej.esperanto.cz/