La aŭtuna aranĝo en Žirovnice estas jam malantaŭ ni. Tiuj, kiuj ne ĉeestis nun povas nur bedaŭri. Male, tiuj, kiuj ĉeestis, certe ne forgesos.
Do… Ni atingis la lokon vespere la 4-an de novembro. Ni havis etajn problemojn trovi la ĝustan vojon, sed tio ja povas okazi. :-) Ni renkontiĝis en paroĥejo de Žirovncie, kies kromnomo estas ankaŭ Ripozdomo Esperanto. Do evidente, esperantistoj estas bonvenaj en Žirovnice, ĉar ili tie havas sian propran domon de ripozo.
Post esplorado de proksima restoracio, ni revenis en la ripozdomon kaj ĝuis aktivan ripozadon – ni ludis tablan piedpilkon, babilis, manĝetis ktp.
Hipnota sabato
La plej grava tago de renkontiĝo estis sabato. Matene ni ekis promeni en la urbo kaj tiam ni estis en bona tempo en bona loko. Ni vidis viron, kiu purigis ion sur la bordo de tiea fiŝlago. La viro rimarkis, ke ni interesiĝas pri la afero kaj klarigis al ni, ke la laga akvo funkciigas etan hidroelektran centralon kaj falantaj folioj ŝtopas la akvoenirejon. Tiukaze, li devas malbloki ĝin. Kaj ĉar la viro estis bonkora, li permesis al ni eniri la hidroelektrejon. Ni do vidis malgrandan turbinon, kiu rotaciigas generilon, per kiu la akvaenergio transformiĝas al elektra energio, kiun ni uzas hejme. Do, nun ni jam scias, danke al kio, niaj lampoj lumas.
Nia promeno finiĝis en loka hotelo, kie ni tagmanĝis tre bongustajn manĝojn kaj poste ni revenis al la ripozdomo, ĉar ni atendis gravan gaston: la honora membro de ĈEJ Max Kašparů – konata teologo, psikiatro kaj nun ankaŭ patrono de la konkurso „Lernu Esperanton kaj gajnu eksterlandan ekskurson” – venis prelegi pri hipnoto. Li rimarkigis nin pri multaj superstiĉoj pri hipnoto. Ekzemple li diris, ke homo en hipnota stato faros nur tion, kion li farus vigla. Do, se vi kulpas krimon, vi ne povas elturniĝi, ke vi estis en hipnota stato, juĝo tute ne zorgos. :-) Hipnoto estas plej ofte uzata en medicino – ekzemple, anestezio povas esti anstataŭigita de hipnoto. Kaj surprize, per hipnoto oni povas kuraci ankaŭ verukojn. Sed jen la tubero en la afero… Kvankam hipnotisto povas esti ĉiu homo, kiu partoprenos koncernan kurson, ne ĉiu homo povas esti hipnotigita; oni bezonas talenton por tio kaj se iu ne posedas ĝin, neniu hipnotisto sukcesos.
Post la prelego ni vizitis ekspozicion pri kamparaj iloj, kiuj estis uzataj en pasinteco. Ni tre ŝatis kaleŝon kun leporoj, kiuj estis grandaj kiel plenkreskaj homoj. Kaj kvankam temis pri leporoj, ni pretendis, ke ili estas kunikloj, ĉar kuniklo estas nova maskoto de ĈEJ! Do ni kompreneble bone konatiĝis kun la maskoto en la kaleŝo. :-)
Finfine
Finfine, ni ĉiuj pensis, kiam sabate vespere ni solene ekfunkciigis novan paĝaron de ĈEJ. Ni strebis pri ĝi du jarojn – kaj finfine, jen ĝi estas. Bela, klara, verda. :-) Samtempe, ĈEJ havas novan logon, ĝis nun, ni ne havis ĝin kaj kelkfoje, ĝi bezonatis. Ekde nun, kiel la logo nin reprezentos verda, kvinpinta stelo sur silueto de Ĉeĥio. Ni ne forgesu diri, ke la aŭtoro de nia logo kaj paĝaro estas Honza Šebetovský. Koran dankon al li! :-)
Samtempe kun la nova paĝaro ankaŭ komenciĝis jam menciita konkurso „Lernu Esperanton kaj gajnu eksterlandan ekskurson.“ La konkurso estas por ĉiuj neesperantistoj pli junaj ol 30, kiuj povas, se ili lernos Esperanton, gajni partoprenon en SES 2012.
(Ne)falantaj kegloj
Post la solena tosto pro la nova paĝaro, ni denove venis en la urbon. Dum la tago ni trovis, ke en la hotelo, kie ni tagmanĝis, eblas ludi bovlingon. Ni kompreneble devis tion provi. Kaj jen montriĝis, kiu havas ambaŭajn manojn mallertajn. Ies kegloj senprobleme falis, ies tute ne zorgis kaj kontente staris en siaj lokoj… (Ni ne diru, kies manoj estas ambaŭ maldekstraj, ĉu Dan?) :-D Sed ni ĉiuj vere ĝuis tiun ĉi danĝeran batalon.
Tamen, ĉio devas iam finiĝi. Post du horoj, ni devis forlasi la bovlingon kaj reveni en la ripozdomon, ĉar jam atendis nin niaj litoj nun, kaj matene la vojaĝo hejmen.
Ĉu vi nun bedaŭras, ke vi ne alvenis? Ne timu, vi povas veni venontfoje! Venonta renkontiĝo okazos februare aŭ marte, do estu atentemaj! :-)
Kaj vi almenaŭ povas rigardi fotojn el la renkontiĝo fare de Vlasta Pištíková. :-)